Sunday, May 24, 2009

ရဟန်းဝတ်လိုပါလျှင်...

ဒကာလေးမင်းမင်းရေ...
ရဟန်းအပြီးဝတ်မှာလား ယာယီဝတ်ချင်တာလားတော့ မသိပါ...

အပြီးဝတ်မယ်ဆိုရင်တော့ စာကိုသေသေချာချာ သင်စေလိုပါတယ် ဒါ့ကြောင့် စာသင်စာချဆရာတော်ထံမှာ ၀တ်စေချင်ပါတယ်... စာကိုအနည်းငယ် လေ့လာပြီး တရားပဲ ကျင့်လိုတာဆိုရင်တော့ ကမ္မဋ္ဌာန်းပြ ဆရာတော်ထံမှာလည်း သင့်လျှော်ပါတယ်... ဘာပဲဖြစ်ဖြစ်လေ အရေးကြီးတာက မိမိဆရာတင်မဲ့သူက သီလကို အလေးထား ချစ်မြတ်နိုးသူကို ရှာဖို့ပဲလိုပါတယ်...

မိမိမှာ ကိုယ်ပိုင် သပ်ိတ်(အမဲရောင်) သင်္ကန်း (အောက်+အပေါ်+နှစ်ထပ်သင်္ကန်း=သုံးထည်) ရှိထားရပါ့မယ်... ဒါက လိုရင်းပြောတာပါ... အကျယ်ချဲ့မယ်ဆိုရင်တော့ ပရိက္ခရာ ၈-ပါးရှိရပါမယ်...

ပြည့်စုံပြီဆို ကိုရင်(ရှင်သာမဏေ) ၀တ်ပါမယ်...

၁။ ခေါင်းရိတ်ခြင်း...
၂။ သင်္ကန်းဝတ်ပေးမည့် ဆရာဖြစ်သူပေးသော သင်္ကန်းနှင့် ဆရာကိုယ်တိုင်ဖြစ်စေ... ဆရာခိုင်းစေသူက ဖြစ်စေ ၀တ်ပေးခြင်း...
၃။ သရဏဂုံသုံးပါးကို ပီပီသသ ရွတ်ဆိုခြင်းတို့ဖြစ်ပါတယ်...

မိမိကိုယ်ပိုင် သင်္ကန်းရှိတာပဲဆိုပြီး ကိုယ်တိုင်ဝတ်ရုံနှင့် သာမဏေမဖြစ်ပါ...
ဆရာရဟန်းရှိမှသာ ပြုပေးမှသာ ရှင်သာမဏေဖြစ်ပါတယ်...
ဒါကတော့ ရှင်သာမဏေပြုရန် လိုရင်းလေးဖြစ်ပါတယ်...

ရှေးအစီအစဉ်အရ...
***သံဃာအလယ်သို့ဝင်ရန် ခွင့်တောင်းရပါ့မယ်...
အဟံ ဘန္တေ သံဃမဇ္စျေ ပဝေသနံ အာပုစ္ဆာမိ။
အရှင်ဘုရား တပည့်တော်သည် သံဃာအလည်သို့ဝင်ရန် ပန်ကြားပါ၏...

***မိမိပိုင်သင်္ကန်းကို ဆရာဖြစ်သူထံသို့ အပ်နှံခြင်း...
သကလ ဝဋ္ဋ ဒုက္ခ နိဿရဏ နိဗ္ဗာနဿ သစ္ဆိကရဏတ္ထာယ (ဣမံ) ကာသဝံ (ဂဟေတွာ) ပဗ္ဗာဇေထ မံ ဘန္တေ အနုကမ္ပံ ဥပါဒါယ။

အလုံးစုံသော သံသရာဝဋ်ဆင်းရဲမှ ထွက်မြောက်ရာ နိဗ္ဗာန်ကို၊ မဂ်ဉာဏ် ဖိုလ်ဉာဏ်ဖြင့် လျင်မြန်စွာ မျက်မှောက်ပြုရခြင်းအကျိုးငှာ။ ဘုရားတပည့်တော် လက်၌ရှိသော ဤသင်္ကန်းကို ယူတော်မူ၍၊ ဘုရားတပည့်တော်ကို အစဉ်သနားသည်ကို အကြောင်းပြု၍၊ ရှင်သာမဏေ ပြုပေးတော်မူပါ အရှင်ဘုရား။

***ဆရာဖြစ်သူထံမှ သင်္ကန်းကို တောင်းခံခြင်း...
သကလ ဝဋ္ဋ ဒုက္ခ နိဿရဏ နိဗ္ဗာနဿ သစ္ဆိကရဏတ္ထာယ (ဧတံ) ကာသဝံ (ဒတွာ) ပဗ္ဗာဇေထ မံ ဘန္တေ အနုကမ္ပံ ဥပါဒါယ။

အရှင်ဘုရား အလုံးစုံသော သံသရာဝဋ်ဆင်းရဲမှ ထွက်မြောက်ရာ နိဗ္ဗာန်ကို။ မဂ်ဉာဏ် ဖိုလ်ဉာဏ်ဖြင့် လျင်မြန်စွာ မျက်မှောက်ပြုရခြင်း အကျိုးငှာ။ အရှင်ဘုရားလက်တော်၌ရှိသော ထိုသင်္ကန်းကို ပေးသနားတော်မူ၍၊ ဘုရားတပည့်တော်ကို အစဉ်သနားသည်ကို အကြောင်းပြု၍ ရှင်သာမဏေ ပြုပေးတော်မူပါ အရှင်ဘုရား။

ခေါင်းမရိတ်ရသေးပါက ခေါင်းရိတ် သင်္ကန်းဝတ်ပါမည် သာမဏေ မဖြစ်သေးပါ...

***သင်္ကန်းဝတ်ပြီး ရှင်သာမဏေပြုပေးရန် တောင်းပန်ရပါမယ်...
ဘန္တေ သံသာရ ဝဋ္ဋ ဒုက္ခတော မောစနတ္ထာယ ပဗ္ဗဇ္ဇံ ယာစာမိ။
ဒုတိယမ္ပိ ဘန္တေ သံသာရ ဝဋ္ဋ ဒုက္ခတော မောစနတ္ထာယ ပဗ္ဗဇ္ဇံ ယာစာမိ။
တတိယမ္ပိ ဘန္တေ သံသာရ ဝဋ္ဋ ဒုက္ခတော မောစနတ္ထာယ ပဗ္ဗဇ္ဇံ ယာစာမိ။

အရှင်ဘုရား (ပ+ဒု+တ) ဘုရားတပည့်တော်သည် သံသရာဝဋ်ဆင်းရဲမှ လွတ်မြောက်ပါရခြင်း အကျိုးငှာ၊ ရှင်သာမဏေ အဖြစ်ကို တောင်းပန်ပါ၏ အရှင်ဘုရား။

***ပြီးရင်တော့ သာမဏေဆယ်ပါးသီလ ယူရပါမည်...
ရှင်သာမဏေဖြစ်ပြီးရင်တော့ သိမ်ထဲတွင် ၅-ပါးအထက်သော ရဟန်းသံဃာနှင့်အတူ သိမ်ဝင်၍ ရဟန်းဘ၀ ခံယူပါမည်...
ကမ္မ၀ါစာဖတ်ပြီးသည်နောက် ရဟန်းသီလ ၂၂၇-ပါး ကိုယ်ဝယ်ဆင်မြန်း ရဟန်းဖြစ်သွားပါပြီ... (အကျယ်အားဖြင့် ကုဋေကိုးထောင်ကျော်)

သိသည်ဖြစ်စေ မသိသည်ဖြစ်စေ ရဟန်းဖြစ်သည့်အချိန်မှစ၍ စောင့်ထိန်းရပါတော့မည်... သို့အတွက် သိအောင်လေ့လာရပါမည်... ယာယီဝတ်သူဖြစ်ဖြစ်... ထာဝရ၀တ်သူဖြစ်ဖြစ် လိုက်နာရပါတော့မယ်... မလိုက်နာပါက အပြစ်ဒဏ်များ လာပါလိမ့်မည်...

ယခင်ကတော့ ပါဠိစာများကို အရကျက်ခိုင်းပါတယ်...
ယခုတော့ များသောအားဖြင့် တိုင်ပေးသည့် အတိုင်းသာ လိုက်ဆိုနိုင်ကြပါတော့သည်...

ဆက်လက်၍သိသင့်သည်များ...
ရှင်ရဟန်းမပြုထိုက်သူ ၃၂-ယောက်...

၁။ လက်ပြတ်သောသူကို ရှင်ရဟန်း ပြုမပေးအပ်။
၂။ ခြေပြတ်သောသူကို ရှင်ရဟန်း ပြုမပေးအပ်။
၃။ လက်ခြေပြတ်သောသူကို ရှင်ရဟန်း ပြုမပေးအပ်။
၎။ နားပြတ်သောသူကို ရှင်ရဟန်း ပြုမပေးအပ်။
၅။ နှာခေါင်းပြတ်သောသူကို ရှင်ရဟန်း ပြုမပေးအပ်။
၆။ နား နှာခေါင်းပြတ်သောသူကို ရှင်ရဟန်း ပြုမပေးအပ်။
၇။ ခြေချောင်း လက်ချောင်းပြတ်သောသူကို ရှင်ရဟန်း ပြုမပေးအပ်။
၈။ ခြေမ လက်မပြတ်သောသူကို ရှင်ရဟန်း ပြုမပေးအပ်။
၉။ အကြောမ ပြတ်သောသူကို ရှင်ရဟန်း ပြုမပေးအပ်။
၁ဝ။ ခြေချောင်း လက်ချောင်း ပူးနေသောသူကို ရှင်ရဟန်း ပြုမပေးအပ်။
၁၁။ ခါးကုန်းနေသောသူကို ရှင်ရဟန်း ပြုမပေးအပ်။
၁၂။ ပုကွသောသူကို ရှင်ရဟန်း ပြုမပေးအပ်။
၁၃။ လည်ပင်းကြီးနာရှိသူကို ရှင်ရဟန်း ပြုမပေးအပ်။
၁၄။ သံပူကပ်၍ တံဆိပ်ခတ်ထားသူကို ရှင်ရဟန်း ပြုမပေးအပ်။
၁၅။ ကြိမ်ဒဏ်ပေးခံရသူကို ရှင်ရဟန်း ပြုမပေးအပ်။
၁၆။ တွေ့ရာအရပ်၌ သတ် ဟူ၍ ကြော်ညာထားသောသူကို ရှင်ရဟန်း ပြုမပေးအပ်။
၁၇။ ခြေထိုင်းသောသူကို ရှင်ရဟန်း ပြုမပေးအပ်။
၁၈။ အနာဆိုးရှိသောသူကို ရှင်ရဟန်း ပြုမပေးအပ်။
၁၉။ ပရိသတ်ကို ဖျက်ဆီးသောသူကို ရှင်ရဟန်း ပြုမပေးအပ်။
၂ဝ။ မျက်စိတစ်ဖက်ကန်းသောသူကို ရှင်ရဟန်း ပြုမပေးအပ်။
၂၁။ လက်ခြေကောက်သောသူကို ရှင်ရဟန်း ပြုမပေးအပ်။
၂၂။ ခွင်သောသူကို ရှင်ရဟန်း ပြုမပေးအပ်။
၂၃။ ကိုယ်တစ်ခြမ်းသေသောသူကို ရှင်ရဟန်း ပြုမပေးအပ်။(ဖက်သကပ်နာ)
၂၄။ ဆွံ့သောသူကို ရှင်ရဟန်း ပြုမပေးအပ်။
၂၅။ အိုမင်းမစွမ်းသောသူကို ရှင်ရဟန်း ပြုမပေးအပ်။
၂၆။ မျက်စိနှစ်ဖက်ကန်းသောသူကို ရှင်ရဟန်း ပြုမပေးအပ်။
၂၇။ (စကားဆွံ့) အသောသူကို ရှင်ရဟန်း ပြုမပေးအပ်။
၂၈။ နားပင်းသူကို ရှင်ရဟန်း ပြုမပေးအပ်။
၂၉။ ကန်းလည်းကန်း အလည်းအသောသူကို ရှင်ရဟန်း ပြုမပေးအပ်။
၃ဝ။ ကန်းလည်းကန်း နားလည်းပင်းသောသူကို ရှင်ရဟန်း ပြုမပေးအပ်။
၃၁။ အလည်းအ နားလည်းပင်းသောသူကို ရှင်ရဟန်း ပြုမပေးအပ်။
၃၂။ ကန်းလည်းကန်း အလည်းအ နားလည်းပင်းသောသူအား ရှင်ရဟန်း ပြုမပေးအပ်။
မြတ်စွာဘုရားသည် သာသနာတွင် အကြည်ညိုပျက်ဖွယ်များ တွေ့ရမည်ကို နှစ်သက်တော်မမူပါ... သို့သော် အရဟတ္တဖိုလ်ကိုတော့ တားမြစ်ခြင်းမရှိပါပေ...

ပြုပေးလျှင် ပြုပေးသူများ ဒုက္ကဋ်အာပတ်သင့်၏...

(ပဋိသန္ဓေနှင့်တကွ အသက်နှစ်ဆယ်မပြည့်သူ၊ ပါရာဇိကသို့ရောက်သူ၊ ပဏ္ဍုက်စသော အဘဗ္ဗပုဂ္ဂိုလ်တစ်ကျိတ်တစ်ယောက်၊ ပေါင်း ၁၃-ယောက်သည် ရဟန်းပြုသော်လည်း ရဟန်းမဖြစ်။ ကြွင်းသောပုဂ္ဂိုလ်တို့ကား ရဟန်းဖြစ်ကုန်၏။ သို့သော် ရဟန်းပြုပေးသောသူ အာပတ်မလွတ်။)

မဟာဝဂ်ပါဠိတော် မြန်မာပြန်၊ ဦးရေ ၅၇၊ စာ ၁၂၇။


နောက်ထပ်... ဤသို့လည်း မေးမြန်းဦးမည်...

နူနာ သူရူးနာ အစရှိသည် ကင်းရဲ့လား...
လူသား စင်စစ် ဖြစ်ရဲ့လား...
ယောက်ျားစင်စစ် ဖြစ်ရဲ့လား...
သူ့ကျွန်အဖြစ်မှ လွတ်ရဲ့လား...
အကြွေးကင်းရဲ့လား...
မင်းခစားအဖြစ်မှ လွတ်ကင်းသူ ဖြစ်ရဲ့လား...
မိဘနှစ်ပါးက ခွင့်ပြုရဲ့လား...
အသက်နှစ်ဆယ် ပြည့်ပြီးသူ ဖြစ်ရဲ့လား...
သပိတ် သင်္ကန်းပြည့်စုံရဲ့လား... စသည်ဖြင့်လည်း မေးမြန်တာခံရပါ့မယ်... ရဟန်းဝတ်လိုသူဖက်က ပြည့်စုံမှုရှိရပါ့မယ်...

((ရဟန်းဖြစ်ပြီးသည်နောက် သိမ်မှထွက်လာသည့်အခါ ရဟန်းသစ်ကလေးများမှာ ဘာအပြစ်မှမရှိသေး၍ လှူဒါန်းလျှင် အကျိုးကြီးမှန်းသိကြကုန်သောသူများက တန်းစီ၍ သိမ်ထွက်မှာ လောင်းလှူကြပါလိမ့်မည်... စာအိပ်ကလေးတကိုင်ကိုင် ငွေဆွမ်းတဲ့... ဘယ်ခေတ်ကပေါ်လာသော အခေါ်လဲတော့မသိပါ... မိမိက သီလစင်ကျယ်သူကိုလှူလျှင် အကျိုးကြီးလို့ ဘုန်းကြီးများလက်ထဲကို ငွေများ လှူလိုက်ပါသည်... ဘုန်းကြီးများတွင် ထိုငွေ အလှူခံမှုကြောင့် အပြစ်များဖြစ်ကြရပြီ မိမိကတော့ မသိလိုက်ပါပေ... အပြစ်ဖြစ်သူ ဘုန်းကြီးများ စောင့်ကြောင့်ထိုင်၍ အာပတ်ဖြေရပေဦးမည်... ခဏခဏ စောင့်ကြောင့် ထိုင်ရခြင်းသည် မကောင်းပါပေ... သူတော်ကောင်းများ စဉ်းစားဖွယ်ရာပင်... ယာယီဝတ်သူရဟန်းသစ်များလည်း သိမ်ကထွက်ထွက်ခြင်း သီလမစင်ကြယ်တော့ပေ...))

ဆက်၍ရေးမည်ဆိုပါလျှင် မကုန်နိုင်ပါပေ...
ဆက်လက်လေ့လာလိုသူများ ရှာဖွေ၍ ဖတ်ရှုကြပါလေ...

စိတ်ချမ်းသာကြပါစေ...
ဒုက္ခဆင်းရဲကင်းဝေးကြပါစေ...
ဦးလောကနာထ
၅.၂၄.၂၀၀၉

No comments: