လောင်းကစား လုပ်၍ အသက်မွေးမှုသည် သမ္မာအာဇီဝဖြစ် မဖြစ်...

သိလိုပါသည်ဘုရား။

7.12.2010 

ဆရာတော်ဘုရား တပည့်တော် ရိုသေစွာ ဦးညွတ်လျောက်ထားအပ်ပါသည်ဘုရား။

သမ္မာအာဇီဝဖြစ် မဖြစ်
အပြစ်ရှိသော အသက်မွေးမှုထဲတွင် လောင်းကစား လုပ်၍ အသက်မွေးမှု ပါမပါ သိလိုပါသည်ဘုရား။ (ယခုခေတ် ချဲထီရောင်း/ ဒိုင်လုပ်၍ အသက်မွေးသူ ၊ ဘောလုံးပွဲ လောင်းကြေးဒိုင်ပြုသူ) ထိုသူတွေရဲ့ အသက်မွေးမှုကို သမ္မာအာဇီဝ ဖြစ်တယ်လို့ ဆိုနိုင်ပါသလားဘုရား။ ဥပဒေအရ ငြိစွန်းသော်လည်း သမ္မာအာဇီဝ ဆိုတာ အသက်မွေးဝမ်းကျောင်းပြုစဉ်မှာ (ကာယ+၀စီ) ဒုစရိုက်တွေကိုရှောင်ရင် သမ္မာအာဇီဝဖြစ်တယ်လို့ ဆိုသလားလို့ပါ။ တပည့်တော် အမှတ်မှားခဲ့ရင်လည်း အမှန်ကို ဟောညွှန်ပြပေးတော်မူပါဘုရား။ အပြစ်ရှိသော အသက်မွေးမှုထဲတွင် လောင်းကစား လုပ်၍ အသက်မွေးမှု ပါမပါ သိလိုပါသည်ဘုရား။

မဟာသက္ကရာဇ် ၆၈ တပည့်တော်နဲ့ တပည့်တော် သူငယ်ချင်းမတစ်ယောက် အဲဒီ မဟာသက္ကရာဇ် ၆၈ ဆိုတာ ဘယ်အချိန်က ဘာအတွက် စရေတွက်လို့ ၆၈ လို့မှတ်ရသလဲဆိုတာ သိချင်နေခဲ့လို့ တာကိုပါ တလက်ဆတည်း မေးလျောက်ခွင့်ပြုပါဘုရား။

မာနတ် ဘာဆုပန်ခဲ့သလဲ ဘုရားရှင်ကို အမြဲနှောက်ယှက်ခဲ့သော မာနတ်က ဘယ်လိုဆုတောင်းများရှိခဲ့ ပြီး ဘယ်လိုအကျင့်တွေကျင့်လို့ နတ်ပြည် ၆ထပ်မှာ အမြင့်ဆုံး ဘုံတွင် စံနေရတာလဲသိချင်ပါတယ်ဘုရား။

တပည့်တော် တရားစာတွေလာဖတ်သွားပါသည်ဘုရား။
ဆရာတော် ကိုယ်ရော စိတ်ပါ အစဉ် အေးချမ်း ၍ ကျန်းမာစွာဖြင့် သာသနာပြု လုပ်ငန်းများ အစဉ်ဆောင်ရွက်နိုင်ပါစေလို့ ဆုတောင်း ဆန္ဒပြုပါတယ်ဘုရား။

ရိုသေစွာ ဦးချ ကန်တော့ခဲ့ပါသည်။
တပည့်တော် E S


သမ္မာအာဇီဝဖြစ် မဖြစ်...
အဖြေ။ ။အပြစ်ရှိသော အသက်မွေးမှုထဲမှာ လောင်းကစားလုပ်ခြင်း ပါသလားမေးခဲ့သော် ပါတယ်လို့ ဖြေရပါမယ်... ဘာလို့ဆို လောင်းကစား မှန်သမျှ မိမိသူတစ်ပါး စိတ်ဆင်းရဲကြရတဲ့အတွက် အပြစ်ရှိတယ်လို့ သတ်မှတ်ပါတယ်... ကစားသူများအားလုံး လောဘဒေါသ မောဟတွေနဲ့ ရယူလိုကြတယ်... ရှုံးသောသူကလည်း လောဘဒေါသ မောဟတွေနဲ့ မပေးလို... နိုင်သည့်သူကလည်း လောဘဒေါသ မောဟတွေနဲ့ ရယူလိုတဲ့အတွက် အကုသိုလ်အပြစ် ဖြစ်ပါတယ်...


(ယခုခေတ် ချဲထီရောင်း / ဒိုင်လုပ်၍ အသက်မွေးသူ ၊ ဘောလုံးပွဲ လောင်းကြေးဒိုင်ပြုသူ) ထိုသူတွေ ရဲ့ အသက်မွေးမှုကို သမ္မာအာဇီဝ ဖြစ်တယ်လို့ ဆိုနိုင်ပါသလားဘုရား။
သည်လိုမေးခဲ့ရင် သမ္မာအာဇီဝလည်း မဖြစ်နိုင်... ဒါဆိုမိစ္ဆာဇီဝလား ဆိုပြန်ရင်လည်း ကာယဒုစရိုက် ၃-ပါးနဲ့ ၀စီဒုစရိုက် ၄-ပါး လုံခြုံလျှင် မိစ္ဆာဇီဝ ရှောင်ကြဉ်ပြီး ဖြစ်သည်ဟု ဆိုထားသည်အတွက်... မိစ္ဆာဇီဝထဲလည်း မရောက်သေး ဆိုရမလိုပါ... ဒါပေမဲ့ ၉၉.၉၉-ဟာ ၁၀၀- မဟုတ်သေးပေမဲ့ ၁၀၀-လောက်နီးပါးပါပဲ... ဒါကြောင့် မိစ္ဆာဇီဝလောက်နီးပါး အပြစ်ရှိတယ်လို့တော့ ယူဆပါတယ်... ရှုံးသောသူများဟာ သဒ္ဓါကြည်ဖြူစွာနဲ့ နိုင်သောသူကို ပေးကြတာ မဟုတ်ပါဘူး... ဒါကြောင့် ပိုင်ရှင်မပေးလိုသော ပစ္စည်းကို ယူတဲ့သဘောလည်း ရှိနေပါတယ်... အဒိန္နာဒါန သည်ထိတော့လည်း မဟုတ်သေးပေါ့...

သည်ကိစ္စမျိုးက သူတော်ကောင်းအားလုံးကို မေးမယ်ဆိုရင်တော့ မတရားသော လုပ်ရပ်အဖြစ်သာ ကဲ့ရဲ့ရှုံ့ချမှာ ဖြစ်ပါတယ်...

လောင်းကစား ပြုလုပ်သည်အတွက် ဗုဒ္ဓဟောကြား စာပေထဲမှ ဆိုးကျိုးတစ်ချို့ကို ရေးပေးလိုက်ပါမယ်...

စည်းစိမ်ပျက်ကြောင်း ၆-ပါးထဲက... နံပါတ် ၄-ကတော့ မေ့လျော့ကြောင်းဖြစ်သော လောင်းကစားလေ့ရှိခြင်းသည် စည်းစိမ်ပျက်ကြောင်းတည်းလို့ ပြထားပါတယ်... ခင်ပွန်းယုတ် အပြစ် ၆-ပါးထဲက... နံပါတ် ၁-ကတော့ လောင်းကစားကြူးသူသည် ခင်ပွန်းယုတ်တည်းလို့ ပြထားပါတယ်...

လောင်ကစားခြင်း အပြစ် ၆-ပါးရှိပါတယ်...
၁... နိုင်သောသူသည် ရန်များသည် ရန်မီးပွားသည်...
၂... ရှုံးသောသူသည် ဥစ္စာအတွက် ပူပန်ရမည် မိသားစု စိတ်ဆင်းရဲရမည်...
၃... ကိုယ်တွေ့မျက်မြင် ပစ္စည်းဥစ္စာ ဆုတ်ယုတ်သည်...
၎... တရားရုံး၌ လောင်ကစားသမားစကား သက်သေအဖြစ် မတည်...
၅... အဆွေခင်ပွန်းတို့သည် မထီမဲ့မြင် ပြုကြ၏...
၆... သူသည်ကစားသမားတည်း သားမယားကို လုပ်ကြွေးရန် မစွမ်းနိုင်ဟု သားပေး သမီးယူ ပြုလိုသူတို့သည် အလိုမရှိကြကုန်... လူ့ဘ၀ကို ဖျက်ဆီးတတ်သော အကျင့်ဆိုးတွေထဲမှာလည်း လောင်ကစားခြင်းဟာ တစ်ခု အပါအ၀င်ဖြစ်ပါတယ်...

ဤသို့ ဆိုးကျိုးများစွာ ရှိနေသည့်အတွက် အမျိုးကောင်းသားတို့ကို ရှောင်ရှားစေလိုပါတယ်... ရှောင်နိုင်ကြပါစေ...

မဟာသက္ကရာဇ် ၆၈...

အဖြေ။ ။မြတ်စွာဘုရား၏ အဖိုးတော်သူ မယ်တော်မာယာ၏ဖခင် ဘိုးတော်အဉ္စနမင်းလက်ထက် ရောက်ဆဲရှိနေသော ဂေါဇာသက္ကရာဇ် ၈၆၄၉-ခုနှစ်ကို ဖြိုဖျက်ပြီး... ၁-မှ စ၍ ရေတွက်သည်ကို မဟာသက္ကရာဇ်ဟု ခေါ်ဆိုပါတယ်... ၆၈-ခု ပြည့်သောနှစ်မှာ ဘုရားလောင်းကို ဖွားမြင်တော်မူသည့်အတွက်... မဟာသက္ကရာဇ် ၆၈-မှာ ဖွားတော်မူသည်လို့ မှတ်တမ်းတင်ပါတယ်...

မာနတ် ဘာဆုပန်ခဲ့သလဲ...

အဖြေ။ သုဂတိဘုံမှာ နတ်ဖြစ်တာကတော့ ကာမာဝစရ ကောင်းမှုကုသိုလ်တွေကြောင့်လို့ ပြောရမှာဖြစ်ပါတယ်... နှောက်ယှက်တတ်သူ မာရ်နတ်ဖြစ်ရခြင်းကတော့ ပါလာတဲ့ အကုသိုလ် ၀သီ အကျင့်တွေကြောင့် ဖြစ်ပါတယ်... မာရ်နတ်ဆုပန်တာတွေနဲ့ ပတ်သက်လို့ကတော့ ခိုင်ခိုင်မာမာကျမ်းအနေနဲ့ မတွေ့ဘူးသေးပါ... ရှင်ဥပဂုတ်ဇာတ်လမ်းကိုတော့ မခိုင်မာ မနှစ်သက်သည့်အတွက် သူထဲတွင်ပါနေသော မာရ်နတ်ဆုတောင်း ထည့်မပြောတော့ပါ...

မိသားစုအားလုံး စိတ်ချမ်းသာကြပါစေ...

အပ္ပမာဒတရား လက်ကိုင်ထားလို့ သူတောင်ကောင်းတရားတွေ ကျင့်နိုင်ကြစေ မြတ်ဗုဒ္ဓအမွေ... ဦးလောကနာထ
၇.၂၈.၂၀၁၀